‘अंधकार दूर करण्याचा माझा यज्ञ म्हणजेच श्रीमद्पुरुषार्थ’

‘सत्यप्रवेश’ हा श्रीमद्पुरुषार्थ ग्रंथराजाचा पहिला खंड असून सद्गुरु श्रीअनिरुद्ध बापूंच्या जीवनकार्याला अनुसरून गृहस्थजीवनामध्ये राहून परमार्थप्राप्ती करण्याचा राजमार्ग हा खंड दिग्दर्शित करतो. भक्ती, पुरुषार्थ ह्यांचा अचूक अर्थ समजावून देऊन अध्यात्मविषयक भय दूर करून विवेकी, आनंदी व समाधानी जीवन घडवण्याविषयीचे मार्गदर्शन करणारा हा खंड आहे.

भगवंताचे प्रत्येकावर प्रेम असतेच, मानवाला फक्त या सत्याची जाणीव ठेवून भगवंताच्या प्रेमास प्रतिसाद देत भगवंताच्या प्रेमराज्यात प्रवेश करायचा असतो, हेच ‘सत्यप्रवेश’ आम्हाला सांगतो.

अवघे विश्‍व, प्रत्येक जीवात्मा यांचा प्रवास अनन्तकाळापासून सुरूच आहे. विश्‍व असो की प्रत्येक जीवात्मा हे सर्व ज्याच्यातून उत्पन्न होतात, ज्याच्यात राहतात आणि ज्याच्यात लय पावतात, त्या सत्य-प्रेम-आनन्दाचा मूळ स्रोत असणार्‍या भगवंताच्या प्रेमाने प्रेरित होऊन भगवंताच्या दिशेने केलेला प्रवासच आनंदी, सुफळ-संपूर्ण होतो.

प्रत्येक भक्त हा प्रवास कसा करू शकतो, हे स्पष्ट करतो सद्गुरु श्री अनिरुद्धलिखित ‘प्रेमप्रवास’ हा खंड. या खंडाच्या ‘पूर्वरंगा’मध्ये परमेश्‍वराची, परमात्म्याची ओळख करून दिली गेली आहे, तर ‘श्रीरंगा’मध्ये नवविधा निर्धाराच्या सहाय्याने भगवंताचे अखंड सामीप्य कसे प्राप्त करावे याचे स्पष्टीकरण आहे. या खंडातील ‘मधुफलवाटिका’ हा तिसरा विभाग हा श्रीरामाच्या श्रद्धावान वानरसैनिकांचे विश्रामस्थान असून या वाटिकेतील मधुर ओजस्वी मधुफले पुरुषार्थ करण्याचे सामर्थ्य देऊन शान्ती, तृप्ती आणि समाधान देणारी आहेत.